ფარმაცევტული კომპანია Revolution Medicines-ის ექსპერიმენტულმა პერორალურმა პრეპარატმა, კლინიკური კვლევის გვიან ეტაპზე, პანკრეასის კიბოს მქონე პაციენტების სიცოცხლის ხანგრძლივობა, სტანდარტულ ქიმიოთერაპიასთან შედარებით, თითქმის გააორმაგა. კვლევის შედეგების გამოქვეყნებისთანავე, კომპანიის აქციების ფასი 40%-ით გაიზარდა.
დღეში ერთხელ მისაღები აბის – დარაქსონრასიბის (Daraxonrasib) გამოყენებისას, პაციენტთა საერთო გადარჩენადობის მედიანურმა მაჩვენებელმა 13.2 თვე შეადგინა, მაშინ როდესაც სტანდარტული ქიმიოთერაპიის ჯგუფში ეს მაჩვენებელი მხოლოდ 6.7 თვე იყო. ანალიტიკოსების მოლოდინი საერთო გადარჩენადობაზე (რაც მოიცავს პერიოდს დიაგნოზის დასმიდან სიკვდილამდე) 11-12 თვეს შეადგენდა, შესაბამისად, ახალმა პრეპარატმა პროგნოზებს მნიშვნელოვნად გადააჭარბა.
ახალი პრეპარატი მიზანმიმართულად მოქმედებს RAS მუტაციებზე, რომლებიც სიმსივნის ზრდას უწყობს ხელს და პანკრეასის კიბოს შემთხვევების 90%-ზე მეტში გვხვდება. აღნიშნულ კვლევაში მონაწილეობდნენ მეტასტაზური პანკრეასის სადინროვანი ადენოკარცინომის (PDAC) მქონე პაციენტები, რომლებსაც მანამდე უკვე ჰქონდათ ჩატარებული მკურნალობა. პაციენტებს აღენიშნებოდათ RAS ვარიანტების ფართო სპექტრი, ასევე იყვნენ პაციენტები იდენტიფიცირებული RAS მუტაციის გარეშეც.
J.P.Morgan-ის ანალიტიკოსის, ბრაიან ჩენგის შეფასებით, ეს შედეგი დარაქსონრასიბს პანკრეასის კიბოს (PDAC) მკურნალობის ახალ სტანდარტად აქცევს. პანკრეასის კიბო გლობალურად ერთ-ერთი ყველაზე მომაკვდინებელი დაავადებაა, რომლის 5-წლიანი გადარჩენადობის მაჩვენებელი ძალიან დაბალია და დაახლოებით 13%-ს შეადგენს. RBC Capital Markets-ის ანალიტიკოსის, ლეონიდ ტიმაშევის ვარაუდით, მხოლოდ აშშ-ში ამ პრეპარატის გაყიდვების პოტენციალი 5 მილიარდ დოლარს აჭარბებს.
კლინიკურმა კვლევამ წარმატებით შეასრულა ყველა მთავარი და საკვანძო მეორადი მიზანი, მათ შორის დაავადების პროგრესირების გარეშე გადარჩენადობის (Progression-Free Survival) გაუმჯობესება. Evercore ISI-ის ანალიტიკოსი ქორი კასიმოვი ამ მონაცემებს აფასებს, როგორც კლინიკური პრაქტიკის შემცვლელ და პრეპარატის სწრაფი, მაღალეფექტური დანერგვის ხელშემწყობ ფაქტორს.
კომპანია Revolution Medicines გეგმავს კვლევის მონაცემების წარდგენას გლობალურ მარეგულირებელ ორგანოებში, მათ შორის აშშ-ის სურსათისა და წამლის სააგენტოში (FDA). კომპანიას უკვე მიღებული აქვს FDA-ს პრიორიტეტული განხილვის ვაუჩერი, რაც წამლის განვითარებისა და განხილვის პროცესის დაჩქარებას ისახავს მიზნად. ექსპერტების ვარაუდით, არსებობს დიდი პოტენციალი, რომ პრეპარატმა ოფიციალური ავტორიზაცია მიმდინარე წლის ბოლომდე მიიღოს. პარალელურად, აღნიშნული პრეპარატის ეფექტურობა ფასდება სხვა მიმდინარე გვიანი სტადიის კლინიკურ კვლევებშიც, მათ შორის ფილტვის არაწვრილუჯრედოვანი კიბოს მიმართულებით.
