Moderna-მ და Merck-მა სამშაბათს გამოაცხადეს, რომ მათმა ექსპერიმენტულმა, პერსონალიზებულმა ვაქცინამ კანის კიბოს ყველაზე მომაკვდინებელი ფორმის (მელანომა) რეციდივისა და სიკვდილიანობის რისკი მნიშვნელოვნად შეამცირა. ეს შედეგი შენარჩუნებულია მკურნალობის დაწყებიდან 5 წლის შემდეგაც.
მეორე ფაზის კვლევაში მონაწილეობდნენ მაღალი რისკის მქონე პაციენტები, რომლებსაც მელანომის ქირურგიული ოპერაცია ჰქონდათ გაკეთებული.
კვლევამ აჩვენა, რომ პაციენტებში, რომლებიც იღებდნენ ახალ ვაქცინას (სახელწოდებით “intismeran autogene”) Merck-ის ცნობილ იმუნოთერაპიულ პრეპარატ “Keytruda”-სთან კომბინაციაში, რეციდივის ან სიკვდილის რისკი 49%-ით შემცირდა (მხოლოდ Keytruda-ს გამოყენებასთან შედარებით).
ეს მონაცემები თანმიმდევრულია 2023 წელს გამოქვეყნებულ 3-წლიან შედეგებთან, რაც ადასტურებს მკურნალობის ეფექტის ხანგრძლივობას.
ვაქცინა ეფუძნება mRNA ტექნოლოგიას. ის არის პერსონალიზებული:
-
იღებენ პაციენტის სიმსივნის ნიმუშს.
-
განსაზღვრავენ მის გენეტიკურ ხელწერას.
-
ქმნიან ვაქცინას, რომელიც ასწავლის იმუნურ სისტემას, ამოიცნოს და შეუტიოს კონკრეტულად ამ პაციენტის სიმსივნურ უჯრედებს.
ანალიტიკოსების შეფასებით, თუ ეს შედეგები (49%-იანი რისკის შემცირება) დადასტურდება მიმდინარე ფართომასშტაბიან, მე-3 ფაზის კვლევაში, ეს იქნება დიდი გარღვევა არა მხოლოდ მელანომის, არამედ სხვა ტიპის სიმსივნეების (ფილტვი, თირკმელი, შარდის ბუშტი) მკურნალობაშიც.
მე-3 ფაზის მონაცემებს 2026 წლის ბოლოსთვის ელოდებიან. ანალიტიკოსები ვარაუდობენ, რომ ვაქცინის ფასი შესაძლოა $200,000-ის ფარგლებში იყოს (რაც Keytruda-ს ფასის ანალოგიურია). ამერიკის კიბოს საზოგადოების პროგნოზით, 2026 წელს აშშ-ში მელანომის დიაგნოზს დაახლოებით 112 000 ადამიანს დაუსვამენ.
სრულად გაეცნანით წყაროს მერკის ვეგვერდზე.
