როცა ამერიკელ სკოლის მოსწავლეებს სთხოვენ დახატონ მეცნიერი, ისინი სულ უფრო ხშირად ხატავენ ქალებს. ეს არის ახალი კვლევის მთავარი დასკვნა, რომელმაც 5 ათწლეულის განმავლობაში 5-დან 18 წლამდე ასაკის ბავშვების მიერ შესრულებული 20 860 ნახატის მონაცემები შეაგროვა.
1960-იან და 1970-იან წლებში მოსწავლეთა 1%-ზე ნაკლები ხატავდა მეცნიერს ქალის სახით. თუმცა, დროთა განმავლობაში “დახატე მეცნიერის” ესკიზებში ქალების პროცენტული მაჩვენებელი გაიზარდა და 2016 წლისთვის დაახლოებით 34%-ს მიაღწია.
მონაცემები კიდევ უფრო მკვეთრია, როდესაც მხოლოდ გოგონების ნახატებს ვაკვირდებით: პირველი ორი ათწლეულის განმავლობაში მათგან მხოლოდ 1% ხატავდა ქალებს, მაგრამ ბოლო ათწლეულში გოგონების ნახევარზე მეტმა მეცნიერი ქალის სახით დახატა. კვლევის შედეგები ჟურნალ “Child Development”-ში გამოქვეყნდა.
ბავშვების აღქმაში არსებული ეს ტენდენცია ემთხვევა ქალი მეცნიერების რეალური რაოდენობის ზრდას. დაახლოებით იმავე პერიოდში (1960-დან 2013 წლამდე) მეცნიერების სფეროში დასაქმებული ქალების პროცენტული მაჩვენებელი სხვადასხვა დისციპლინაში საგრძნობლად შეიცვალა:
-
ბიოლოგია: გაიზარდა 28%-დან 49%-მდე.
-
ქიმია: გაიზარდა 8%-დან 35%-მდე.
-
ფიზიკა და ასტრონომია: გაიზარდა 3%-დან 11%-მდე.
მართალია, მეცნიერთა უმეტესობას ჯერ კიდევ კაცები წარმოადგენენ, მაგრამ დროთა განმავლობაში ეს სურათი იცვლება – როგორც რეალურ ცხოვრებაში, ისე ბავშვების წარმოსახვაში.
