2025 წლის 12 აგვისტოს, გამოცემა Los Angeles Times-ში, ბიზნეს მიმომხილველმა მაიკლ ჰილტზიკმა გამოაქვეყნა ვრცელი ანალიტიკური სტატია სათაურით: “რობერტ კენედი უმცროსის გადაწყვეტილება mRNA ვაქცინის კვლევების გაუქმების შესახებ იმაზე უარესია, ვიდრე თავდაპირველად ჩანდა“.
სტატია ეხება აშშ-ის ჯანმრთელობისა და სოციალური მომსახურების მდივნის, რობერტ ფ. კენედი უმცროსის, გადაწყვეტილებას, გააუქმოს 22 კონტრაქტი და შეწყვიტოს 500 მილიონი დოლარის ფედერალური დაფინანსება mRNA ვაქცინების კვლევისთვის. კენედიმ თავისი გადაწყვეტილება ახსნა მტკიცებით, რომ mRNA ტექნოლოგია მეტ რისკს შეიცავს, ვიდრე სარგებელს და დაეყრდნო 181-გვერდიან დოკუმენტს, რომელიც 400-მდე სამეცნიერო ნაშრომს აერთიანებდა.
თუმცა, როგორც მაიკლ ჰილტზიკი წერს, ამ დოკუმენტის დეტალური შესწავლა სურათს რადიკალურად ცვლის. კერძოდ, 400-მდე ნაშრომიდან მხოლოდ 40-მდე ეხება ვაქცინებს, დანარჩენი კი COVID-19-ით ინფიცირების შედეგებს შეისწავლის. ის მცირე ნაწილიც კი, რომელიც ვაქცინებს ეხება, ხშირად ჩატარებულია ლაბორატორიის თაგვებზე და არა ადამიანებზე, თანაც არასტანდარტული მეთოდებით – მაგალითად, ინექციებით პირდაპირ ტვინში. რაც მთავარია, კვლევების ეს კრებული შედგენილია არა აშშ-ის მთავრობის მეცნიერების, არამედ ვაქცინების ცნობილი მოწინააღმდეგეების მიერ წიგნისთვის, სახელწოდებით “ტოქსიკური გასროლა“. სტენფორდის უნივერსიტეტის ექსპერტი ჯეიკ სკოტი ამას კლასიკურ შერჩევით მიკერძოებას უწოდებს.
ჰილტზიკი ხაზს უსვამს, რომ კენედის უწყებამ სრულად უგულებელყო მასშტაბური და ავტორიტეტული კვლევები, რომლებიც mRNA ვაქცინების უსაფრთხოებასა და ეფექტიანობას ადასტურებს. მაგალითად, დანიური კვლევა, რომელშიც 1 მილიონზე მეტი ადამიანი მონაწილეობდა, შეამოწმა 29 პოტენციური გვერდითი მოვლენა და დაადგინა, რომ ვაქცინასთან დაკავშირებული სტატისტიკურად მნიშვნელოვანი რისკი არ არსებობს. კენედის ანგარიშში ასევე არაფერია ნათქვამი გადარჩენილ სიცოცხლეებზე. სტენფორდის ეპიდემიოლოგის კონსერვატიული შეფასებითაც კი, ვაქცინებმა 4 მილიონამდე სიცოცხლე გადაარჩინა, სხვა კვლევებით კი ეს რიცხვი 20 მილიონს აღწევს.
ავტორი ასევე აკრიტიკებს კენედის მიერ გავრცელებულ მცდარ სამეცნიერო შეხედულებებს. კენედის მტკიცების საპასუხოდ, რომ ვაქცინები კარგად არ მუშაობს, ჰილტზიკს მოჰყავს აშშ-ის დაავადებათა კონტროლის ცენტრის მონაცემები, რომლის მიხედვითაც ვაქცინირებულებში სიკვდილიანობა 78-ჯერ ნაკლები იყო. კენედის მოსაზრებაზე, რომ ვაქცინები მუტაციებს იწვევს, სტატიაში განმარტებულია, რომ მუტაციებს ვირუსის შეუფერხებელი გავრცელება აჩქარებს, ვაქცინაცია კი ამ პროცესს ამცირებს.
სტატიის დასკვნით ნაწილში საუბარია იმაზე, რომ კენედის ეს ქმედება დამანგრეველ შედეგებს მოიტანს. მინესოტას უნივერსიტეტის ინფექციურ დაავადებათა ექსპერტი, მაიკლ ოსტერჰოლმი, ამბობს: “ცალსახად შემიძლია ვთქვა, რომ ეს არის ყველაზე საშიში საზოგადოებრივი ჯანდაცვის გადაწყვეტილება, რაც კი ოდესმე მინახავს მთავრობის მხრიდან“. ეს გადაწყვეტილება აფერხებს არა მხოლოდ COVID-19-თან ბრძოლას, არამედ დარტყმას აყენებს მთელ პლატფორმაზე, რომელსაც უდიდესი პოტენციალი აქვს ებრძოლოს გრიპს, აივ-ს, მალარიასა და კიბოსაც კი. ეს ნაბიჯი წლებით უკან დახევს ამერიკულ მეცნიერებას და ტექნოლოგიურ ლიდერობას ევროპასა და ჩინეთს დაუთმობს. სტატიაში ასევე ნახსენებია ჯანმრთელობის ეროვნული ინსტიტუტის ახალი ხელმძღვანელის პოზიცია, რომელიც აცხადებს, რომ mRNA პლატფორმა სიცოცხლისუნარიანი აღარ არის, რასაც ავტორი ტექნოლოგიურ ინოვაციაზე თავდასხმად და დეზინფორმაციის გაძლიერებად აფასებს.
ასევე დაგაინტერესებთ:
კენედი უმცროსმა ვაქცინების მთავარი საკონსულტაციო საბჭო სრულად დაითხოვა
