იტალიის ჯანდაცვის სამინისტრომ 25 მარტს ოფიციალურად დაადასტურა, რომ ლომბარდიის რეგიონში ჰოსპიტალიზებულია პაციენტი, რომელსაც ფრინველის გრიპის ქვეტიპი – A(H9N2) დაუდგინდა. პაციენტი ევროპის კონტინენტის გარეთ მოგზაურობდა და ეს ფრინველის გრიპის H9N2 შტამით ადამიანის ინფიცირების პირველი შემთხვევაა ევროპაში.
სამინისტროს პრესრელიზის თანახმად, რუტინული პრევენციისა და ზედამხედველობის ღონისძიებების ფარგლებში, უკვე ჩატარდა ყველა საჭირო შემოწმება და გამოვლენილია პაციენტის კონტაქტები. ინფიცირებულს აქვს თანმხლები სამედიცინო მდგომარეობები და ის ამჟამად საავადმყოფოში იზოლაციაში იმყოფება და შესაბამის მკურნალობას იღებს.
დაავადებათა პრევენციისა და კონტროლის ევროპული ცენტრის (ECDC) მონაცემებით, 1998 წლიდან 2026 წლის 27 თებერვლის ჩათვლით, მსოფლიო მასშტაბით აზიისა და აფრიკის ათი ქვეყნის მიერ A(H9N2)-ით ადამიანის ინფიცირების სულ 195 შემთხვევა იყო დაფიქსირებული. სააგენტო ხაზგასმით აღნიშნავს, რომ ამ ვარიანტით ადამიანთა ინფიცირების ჯგუფური (კლასტერული) შემთხვევები, ან ვირუსის ადამიანიდან ადამიანზე გადაცემა არასოდეს დაფიქსირებულა. როგორც წესი, ადამიანის ინფიცირება ძირითადად განპირობებულია ინფიცირებულ ფრინველებთან ან დაბინძურებულ გარემოსთან პირდაპირი კონტაქტით. ECDC-ის განმარტებით, იმ ტერიტორიებზე, სადაც ვირუსი ფრინველებში ცირკულირებს, ფრინველის გრიპით ადამიანთა ინფიცირების სპორადული შემთხვევები მოსალოდნელია.
ამ თვეში გამოქვეყნებულ უახლეს მონიტორინგის ანგარიშში, ECDC-მ და ევროპის სურსათის უვნებლობის ორგანომ (EFSA) აღნიშნეს, რომ 2025 წლის 29 ნოემბრიდან 2026 წლის 27 თებერვლამდე ფრინველის გრიპის 10 შემთხვევა დაფიქსირდა ადამიანებში, თუმცა არცერთი მათგანი ლეტალური არ ყოფილა. ყველა შემთხვევა დაფიქსირდა კამბოჯაში (ერთი A(H5N1) შემთხვევა) და ჩინეთში (რვა A(H9N2) და ერთი A(H10N3) შემთხვევა).
იტალიის საზოგადოებრივი ჯანდაცვის უწყებების მიერ მოწოდებულ ინფორმაციასა და ვირუსის ეპიდემიოლოგიურ მახასიათებლებზე დაყრდნობით, ECDC აფასებს, რომ ევროკავშირის/ევროპის ეკონომიკური ზონის (EU/EEA) ზოგადი პოპულაციისთვის A(H9N2) გრიპთან დაკავშირებული ამჟამინდელი რისკი ძალიან დაბალია.
წაიკითხეთ ფრინველის გრიპის შესახებ ჩვენი სტატიები: ბმული – ფრინველის გრიპი
ასევე დაგაინტერესებთ;
