აშშ-ის პრეზიდენტმა დონალდ ტრამპმა პარასკევს კოვიდ-19-ის განახლებული ბუსტერი და გრიპის სეზონური ვაქცინა გაიკეთა.
ტრამპის ვიზიტი უოლტერ რიდის სამედიცინო ცენტრში უჩვეულო იყო, რადგან ეს მისი მეორე სამედიცინო შემოწმება იყო მიმდინარე წელს, მიუხედავად იმისა, რომ აპრილში ჩატარებული შემოწმება “ყოველწლიურად” მოიხსენიებოდა. პრეზიდენტის ექიმის, შონ ბარბაბელას, განცხადებით, ტრამპმა ვაქცინაცია “მომავალი საერთაშორისო მოგზაურობისთვის მზადების” ფარგლებში ჩაიტარა.
ტრამპის მიერ ბუსტერის გაკეთება საინტერესოა იმ ფონზე, რომ მისმა საკუთარმა ადმინისტრაციამ კოვიდ-19-ის ვაქცინაციის რეკომენდაციები შეცვალა და პროცესი გაართულა. თუ წინა წლებში აცრის გაკეთება აფთიაქში მარტივად იყო შესაძლებელი, ახალი წესებით, CDC ამერიკელებს ურჩევს, ვაქცინაციამდე კონსულტაცია ექიმთან გაიარონ. 65 წლამდე ასაკის ადამიანებისთვის ეს “ინდივიდუალური გადაწყვეტილების” საგანია, ხოლო 65 წელს ზემოთ ასაკის მოქალაქეებს CDC ურჩევს აცრის გაკეთებას ექიმთან კონსულტაციის შემდეგ.
ექიმის ანგარიშში ნათქვამია, რომ ტრამპი “გამორჩეულ ჯანმრთელობაზეა” და მისი “ლაბორატორიული კვლევების შედეგები გამორჩეულია”. ანგარიშის მიხედვით, მისი “გულის ასაკი” რეალურ, 79 წელთან შედარებით 14 წლით ახალგაზრდაა. თუმცა, ექსპერტები აცხადებენ, რომ ეს დასკვნა ეფუძნება ხელოვნურ ინტელექტზე დაფუძნებულ ხელსაწყოს, რომელიც კლინიკურ პრაქტიკაში ფართოდ არ გამოიყენება. თუმცა CNN-ის სამედიცინო ანალიტიკოსმა, კარდიოლოგმა ჯონათან რეინერმა აღნიშნა, რომ თეთრი სახლის ანგარიში სრულყოფილი არაა.
აქვე შეგახსენებთ, რომ საქართველოში გრიპის საწინააღმდეგო ვაქცინაცია დაიწყო. 10 ოქტომბრიდან ვაქცინები ყველასთვის (6 თვის ასაკიდან ზემოთ) უფასოდაა ხელმისაწვდომი.
